Агат, БК 0010, ВКНЦ, ДВК, Вектар... Цяпер гэтыя назвы практычна нічога не гавораць моладзі, хоць да сярэдзіны 90-х гадоў краіна практычна паўсюдна працавала на гэтых «дапатопных» камп’ютарах, і толькі пасля 1994-1995 гадоў IBM-сумяшчальныя камп’ютары канчаткова выціснулі ўсю разнастайнасць вылічальнай тэхнікі тых гадоў.

Веданне гісторыі развіцця вылічальнай тэхнікі з'яўляецца важным кампанентам інфармацыйнай культуры, як дарослых, так і дзяцей.
Ідэя стварэння музея вылічальнай і мультымедыйнай тэхнікі ўзнікла даўно, пачатак калекцыі быў пакладзены ў 1995 годзе. Бытавыя камп’ютары і калькулятары, якія выходзілі з ужывання не выкідваліся, а захоўваліся ў шафах кабінета інфарматыкі. З цягам часу ўтварылася даволі вялікая калекцыя старых вылічальнікаў, таму была пастаўлена мэта сістэматызаваць яе і зрабіць здабыткам многіх. У лістападзе 2014 года ва ўстанове быў арганізаваны  музей вылічальнай і мультымедыйнай тэхнікі, які размяшчаецца ў асобным памяшканне. Няхай невялікім, але асобным.

Усе экспанаты музея можна паглядзець віртуальна, перайшоўшы па адпаведных спасылках.

На дадзены момант у музеі больш за 300 экспанатаў, якія могуць даць няхай не поўную інфармацыю, але магчымасць узнавіць сучасную гісторыю сусветнай і айчыннай вылічальнай, мультымедыйнай тэхнікі.